[美容] 市場上十一大潤唇膏大比拼

[美容] 市場上十一大潤唇膏大比拼

我個嘴無論春夏秋冬四季都會乾到甩皮,真係好肉酸,所以我由細到大都用左好多支潤唇膏,有d太耐之前就丟左個包裝,所以無得影實物俾大家睇~

我心目中一支好用既潤唇膏既條件:

  1. 應該滋潤到嘴唇皮膚而又唔會痴笠笠反晒光咁,亦都唔會要搽好多次先覺得夠潤
  2. 香味不可以太過份,始終有機會食落肚,唔想食野果陣加埋d唇膏味,而個人不太鍾意薄荷味潤唇膏,因為一爆擦果陣搽落去會好痛
  3. 唔貴(50蚊內),因為我每日都會用,唔想係潤唇膏方面晒咁多錢

咁多年黎我只搵到好少岩我要求既潤唇膏。

我用過既幾款曼秀雷敦既潤唇膏。
1. 薄荷系列:
以下呢2支都用過,都係有陣好強既薄荷味,次次meet完嘴皮一搽,真係好醒神,拿到眼水都出埋……重點係搽完都唔覺得佢有潤到,gel會比唇膏潤少少,但都係屬於唔潤既級別。價錢係平,二十蚊左右,問題係用完同無用無咩分別,果廿蚊慳返好過。
20150209_SEE生活_唇膏-有色潤唇膏篇_圖01
2. Lip pure 系列
呢個系統以成份天然作為賣點,我讀中學果陣佢係咁賣廣告,我見朋友話好用,我買左支無香料(圖最左)黎試,果陣萬寧賣40蚊左右一搽上嘴真係好潤,有陣好淡好淡既蜜糖香味,感覺好sweet,成日都好想奶黎食,唯一缺點係夏天果陣比較易斷,搽果陣唔可以太大力,我有回購過,不過唔小心放左入校裙袋一齊入洗衣機,所以掉左。
20150209_SEE生活_唇膏-有色潤唇膏篇_圖02
Lip pure系列仲有支唇蜜,係tube裝,係我支唇膏跌左落洗衣機一齊洗之後我心郁郁想試新野,所以就買左,呢支比唇膏貴2-3蚊,但搽上嘴到會有種痴笠笠既感覺,亦都唔太覺得滋潤,同埋有d超級細粒既閃粒,成日好驚食左落肚。搽上嘴視覺效果係ok,少少令令地,但真係好唔鍾意個質地,所以用左幾次就無用lu
20150209_SEE生活_唇膏-有色潤唇膏篇_圖03
3. 玫瑰花蕾膏 Smith’s –Rosebud Salve
呢隻野係我小學識上網果陣,yahoo拍賣已經勁多人賣,又講到咩空姐必買呀,可以搽嘴搽爆擦搽蚊叮蟲咬,總之就讚到萬能,好世界級。然後有次睇Queenie chan既片見佢讚,話好潤,就心郁郁想試。我係巴黎草莓買左罐黎用,$45有22g,真係抵到爛,後黎又見到萬寧同logon都有,不過賣到成$99,但其實呢隻野上美國網drugstore.com買只係3.99美金左右,係萬寧同logon賣得過份地貴喇。

搽嘴:
唔痴嘴,有微微既粉紅色,搽上嘴效果係好靚
日頭用滋潤度係足夠,但如果訓覺用,就算搽好多都好,一訓醒一定無晒,去唔到唇紋,但可以軟化死皮,有時我q大大pat出黎加砂糖拎去磨嘴d死皮,都幾過癮
搽爆擦:
我好少爆擦所以無試過,但我成日生倒刺,我將d膏搽係指甲邊,軟化到角質
搽蚊叮:
我成日俾蚊咬到好大舊包腫起,勁痕,搽落又唔覺得佢有咩止痕功效,不過見粒蚊爛有層油咁就唔想再R 費事整污糟隻手。

罐野真係死唔斷氣,我已經日日q好大pat出黎搽嘴,但唔知點解用左半年先見底,以咁既價錢係好抵玩,但就無人地講到咁神,去唇紋補濕果d就唔好俾期望,如果用開凡士林既人,可能會覺得兩隻差唔多,因為大家成份主要都係petroleum gel。

4. LUCAS’ PAPAW OINTMENT 澳洲木瓜軟膏
呢支野係家姐做空姐果陣去澳洲買俾我,澳洲野一向都成份天然,所以呢支野入面係無petroleum gel(石油提煉物),亦都係萬用膏,可以搽嘴同蚊叮,但我唔太鍾意佢,因為佢一搽上嘴個感覺好油膩,雖然我嘴係極乾,但佢果種油潤真係誇張到好似拎d油搽上嘴咁,加上有陣古怪既味,由於唔太鍾意佢,所以使用次數都唔多,對佢功效都無咩評價
我試過拎去搽蚊叮,但我愈搽粒野就愈腫,可能我皮膚對呢支野敏感,但我見家姐用又無事,蚊咬一搽就消同止痕
兒家見到萬寧都有呢支野賣,有大支裝同細支裝,價錢好似相差十幾蚊,但份量好似相差左成10g,所以買之前記得睇清楚,加上有時佢可以用man卡積分加錢換購架

5. Etude House Dear Girls Lip Balm
購自韓國Etude House,好似4000won左右,唔太記得,香港Etude House都有得賣,無記錯好似5x蚊,但最平都係去阿信屋kawaiiland,做折果陣買只需$36 左右。
呢隻野我每晚訓之前都會厚厚咁搽一層,佢係同rosebud果個一樣有淡淡既粉紅色
20150209_SEE生活_唇膏-有色潤唇膏篇_圖04 20150209_SEE生活_唇膏-有色潤唇膏篇_圖05
但係搽左上去就唔覺有色,同埋係超級超級令身,質地係超超超超痴笠笠,好老實講感覺係嘔心既,我最憎就係d痴笠笠又反晒光既唇膏,所以我唔會日頭用,只會訓之前用,佢的確好滋潤,訓醒之後個嘴唔會乾晒,仲留左好多係我個嘴到,亦都無咩去唇紋功效。呢粒野同樣地都係死唔斷氣系列,用左勁耐先見底。
20150209_SEE生活_唇膏-有色潤唇膏篇_圖06

6. 理的潤唇膏
大家未必有留意過呢個牌子,但其實萬寧一年四季都有得賣佢,我用過2款:
四季蘆薈潤唇膏
20150209_SEE生活_唇膏-有色潤唇膏篇_圖07
(圖片取自官方Facebook
https://www.facebook.com/UltraReady)
呢支係萬寧賣$32~36,子彈shape,一扭開係白色,無味,但係搽上嘴係滋潤到幾個鐘而感覺並不油膩,厚厚搽完之後死皮係好快軟化晒,好滋潤補濕,唯一缺點係用得快,多數搽一個月就用完,回購左一次,後黎覺得咁快用晒搞到成日要買條數唔come計,所以就放棄佢了,但佢真心係我用過效果最好既一支。

維他命E四季潤唇膏
20150209_SEE生活_唇膏-有色潤唇膏篇_圖08
(圖片取自官方Facebook
https://www.facebook.com/UltraReady)

果陣見到有twin pack,一支維他命E四季潤唇膏加上面果支子彈形既只係$40,心諗咁抵,即買黎試,點知仆街中伏!!!!!!
呢支野都係白色無味,不過成支膠咁,搽左上嘴都唔覺有搽左,完全唔滋潤,亦唔補濕,搽完繼續爆嘴,仲唔知點解好易斷,用用下斷_埋

7. Vichy 潤唇膏
20150209_SEE生活_唇膏-有色潤唇膏篇_圖09
(圖片取自http://www.thehealthcounter.com/view/detail/7545/)
呢支野係家姐朋友送既,打開係白色,味就係商場洗手液果隻勁濃既花香,一搽上嘴人地仲以為你噴左d好俗既香水咁。咁都算,仲要成支膠咁,感覺好似將蠟燭”hi”落個嘴咁,搽勁多下都唔覺得滋潤,我用左幾次之後頂唔順丟左。又膠又臭,好彩唔洗俾錢買,如果唔係真係激死我。

8.  Maybelline baby Lips (香港版)
見到一堆utuber係咁推香港版baby lips,又話咩化妝新手好岩用呀,好潤呀,於是買左,大約$22,搽上手果陣覺得ok呀,有淡淡既粉色,但返到屋企搽上嘴就出事,仆街,卡撚住晒係d唇紋到,搽完成個感覺好嘔心,d死皮凸晒出黎之餘唇紋仲好明顯,嚇到我抹都抹唔切,最後無用過放左係到,話明係潤唇膏,乾到咁樣唔通想我打底再搽佢?唔明utuber點解可以講到咁好用,潤,邊撚到潤呀?

9. Maybelline baby Lips Dr. rescue (外國版)
用完香港版支baby lips之後我睇過好多人分享,話外國版先好用,香港版完全係另一回事,咁我就上drugstore.com買左支外國版,搽上嘴,真係好滋潤,唔痴嘴,好出色,但依然會顯唇紋,同埋我買既色Just Peachy搽左上嘴之後完全係病到就黎死咁既樣,所以都好少會用。

10. 彩豐行滋潤去紋唇膜
呢粒野$15,我就咁去彩豐行單買一粒野仲送左手抽環保袋同一堆sample,一打開好大陣茉莉花香,搽上嘴好滋潤,完全無痴笠笠既感覺,厚厚敷上唇一晚,唇紋真係淡左好多。
20150209_SEE生活_唇膏-有色潤唇膏篇_圖10
但係佢有個致命既缺點,就係佢陣味極侵略性,厚敷完第二朝起身果陣人造花香味會滲晒入口,到食早餐果陣你會覺得食咩都會有陣人造茉莉味,我個人就接受唔到,所以放棄左用。
20150209_SEE生活_唇膏-有色潤唇膏篇_圖11

11. Vaseline Limited Edition: Queen Bee
俾佢包裝吸引而買左,都係萬寧有得賣,$29.9
一打開有陣蜜糖味,聞落都幾濃,了出黎質地同彩豐行果隻係相似,心諗會唔會中伏又搞到我成日蜜糖味呢?好彩隻味係唔會滲入口,搽完只可以潤一陣,好快又乾晒,夜晚訓前搽好多,第二朝都係會無晒,留低一堆已軟化既死皮,呢隻野不過不失啦,可以接受。
最後做返個小總結,大家可以按住自己需求去買

最滋潤:四季蘆薈潤唇膏(缺點:好快用晒)
最long lasting:Etude House Dear Girl Lip Balm(缺點:個嘴會反晒光,仲好痴笠笠)
最抵用:玫瑰花蕾膏 Smith’s – Rosebud Salve(缺點:Last唔到一晚,但日頭用係唔錯)
去唇紋:彩豐行滋潤去紋唇膜(缺點:侵略性既人造花香)

我一定唔會再買:Vichy 潤唇膏,曼秀雷敦,Lip pure tube裝,港版baby lips
(唔好意思,真係完全搵唔到優點)

讚好喧嘩專頁,看更多最新文章

閨中毒女

閨中毒女

二十歲女生,混合偏油肌,外出和上學甚少化妝卻有買和收藏化妝品的怪癖。夢想能夠成為一隻鬆弛熊,每天懶懶閒。


Tags assigned to this article:
平價好物潤唇膏美容護膚

No comments

Write a comment
No Comments Yet! You can be first to comment this post!

Only registered users can comment.