移民?你諗清楚未啊

移民?你諗清楚未啊

香港一年都尾都有唔少人話要移民,例如柒柒柒當選個時啦,選完立法會望住自己中意個個落選個時啦,某局長又公佈啲新既on9政策個時啦,總係有一班人係網上叫春話「香港玩完(誇張者甚至話淪陷)啦唔走唔得啦」,然後就會人得意洋洋咁衝出黎宣佈自己有BNO啊有外國親戚有外國業務總之就係有得移民啦拜拜你條尾,垃圾香港留返俾你班賤民住。

筆者係外國住左一段時間,見識過唔少好引人羨慕、係外國住既香港人,佢地可能係working holiday,讀書、工作、移民、同外國人結婚,但只要你同佢地混得夠熟,好多都會唔嫌柒咁話你聽,係外國生活其實一啲都唔爽,所面對既挑戰唔會比留係香港細。

1. 語言
英文都講唔好既話就算鳩數啦(所謂既講唔好唔止係講唔出,仲有好窒成日ererer、用語成日好formal好柒),但呢個世界唔係所有鬼佬都講英文嫁,尤其去法國意大利日本德國呢啲咁高傲既國家,就算識講英文,答你之前都超超你先,出面買個包都要受白眼,列車故障廣播都聽唔明,人地racist講你壞話又唔知,又淨係搵到啲比唔起係香港個時既工,有幾沮喪你都想像到。仲要不時經歷人地一句陌生語言車埋黎,你個迷惘柒樣成條隊都見到既情景,well,呢個moment你應該覺得係香港做賤民都唔係咁賤。

2. 社交

唔好以為識英文就大曬,好多香港人講英文都好formal,又無乜西式幽默(試過有人將「認真就輸了」直譯,外國人聽唔明,佢就同其他香港人嗔人地無幽默感),溝通到生存到但識朋友就炆水啲,甚至一個唔覺意仲會聽到其他同事gossip下你笑下你啲廣東習慣(其實無傷大雅又算不上racist,不過好多香港人好易感到被冒犯)。又有好多人識到一堆hi bye friend,但無辦法將鬼妹鬼仔變成知心好友,唔開心個時要跨過時差等香港既朋友起曬身先搵到人傾訴。如果係人到中年先移民,呢個問題可能更加嚴重。

3. 飲食

唔好以為食野好小事,當你餐餐都食唔到岩口味既野,當你掛住香港啲雞蛋仔、紙包蛋糕(筆者最愛,因為外國唔興海綿蛋糕,好多蛋糕都係一大舊糖咁,又硬又甜)、珍珠奶茶(呢樣唔算香港美食,不過去外國飲下佢地個啲,就覺得香港既又平又正)、燒味飯、地獄邪惡芝士紫薯乜乜柒柒⋯⋯你可能都可以係外國搵到港式美食,但大多都唔平,而且仲要冒又貴又唔好食既風險(當然有某啲國家好啲)。咁啊,唔出去食咪自己煮囉,但如果想買啲亞洲食材,下下都要走到去賣亞洲食品既專門超市,都咪話幾唔方便。識有人住德國,但好憎食包,完全食唔到佢地啲硬既包,淨係食軟方包,無話唔得既,麻煩啲囉。當然如果你對中餐無感,咁呢樣就唔係問題。

4. 氣候

筆者個人覺得唔係大問題,濕度低既氣候其實幾方便,但有啲人會嫌凍啊,溫差大啊,冬天勁早天黑啊,夏天又勁早天光訓唔到⋯⋯

5. 醫療

無保險好貴,同醫生雞同鴨講,小病搵杯涼茶飲都難,同埋佢地唔鼓勵食藥,一般病通常都係叫你係屋企攤抖下飲下草藥茶/熱湯/檸檬水,而你都知,香港人唔少驚青底,幾多人小小事就纏住醫生開抗生素,係外國人地睬你都有味。

6. 效率

好多人係香港慣左快,去到外國人地上餐又慢賣飛又慢開戶口又慢審批又慢過境又慢,仲要早收工,有啲部門臨關門30分鐘唔做新case,仲要文件(仲要睇唔明,無英文版)多到喊,事無大小都會申請一大輪。而係香港開個銀行戶口到你行出門口已經有得用,都咪話唔掛住。

7. 價值觀

好多人中意用文化衝突黎形容華人到外國接受唔到人地既思維方式,其實不然。姐係飯為主食係香港人既生活方式,但思維保守唔係香港文化,所以筆者會話,如果你思想保守,接受唔到新事物,覺得獅子山下精神超正人人都要超勤力超慳家超上進無/極少娛樂,個仔係學校攞A先收貨,最怕仔女/仔女既朋友食煙飲酒夜蒲婚前性行為著衫好暴露學人搞藝術搞音樂仲要乜鳩gap year去尋找人生意義,外國好危險,why not stay in Hong Kong?

8. 政治

下香港政治好黑暗,無希望喎。屌關你鬼事咩,你有付出過咩,你肯定你有關心過你住既地方?咁你去到外國會唔會關心人地既政治?如果你去到外國同人傾政治,你會發現無一個人唔屌自己國家政治黑暗,唔好聽啲逃兵講兩句就人云亦云,真係咁聽話既,聽下人號召,政府有諮詢個時俾下意見,教好自己個仔唔好被染紅,多啲參加社區事務,大把野要做,得Q閒移民。

外國既月亮特別圓,不過淨係講白色個種,黑色既啡色既黃色既都唔計,香港人其實好racist。

偏差值

偏差值

常常在發掘離經叛道的可能,長期與體內因社教化留下的痕跡搏鬥。


Related Articles

[小莉日記] 瑞士交流歷險記(一)

其實小莉做事從來都過份擔心,到瑞士exc

放榜最緊要冷靜

放榜在即,學生很緊張,老師也不輕鬆。筆者

法文地位的變化

明天考法文,也談談這種語言地位的變化。