破處心經

破處心經

做愛呢樣野,好多處女都躍躍欲試,只不過唔係個個都係性女,可以飢渴到不顧一切,一般都係又怕痛又怕唔識搞,尤其是男朋友都係處個啲,真心驚佢亂插wrong hole,搞到第一次不堪回首就無癮啦。

小妹半年前仲係純情小白兔一隻,「咦你地唔好講埋啲咸濕野啦> <」個種,但俾成班朋友圍片完我,話我唔體貼想要既男朋友之後,我開始怒睇A片,不時上網進修,當然仲有追看喧嘩Blablabla十八禁文,經過一輪努力,幾經辛苦,終於係上個月同同樣係處子之身既男友登上極樂之峰。

仲係處女既朋友望住我蛻變,全部都向我取經,我算唔上專家,係咁二分享下小小心得,希望助各位姊妹早登極樂。(每個人生理結構唔同,我只係話點樣做有機會破處破得容易D,唔包得嫁)

1. 失敗乃成功之母

唔好諗住一次就成功(當然夾硬插實得嫁,但我係講雙方都舒服個種),我同男朋友都試左3次先真係搞得起,第一次佢入左少少我就痛到標曬眼水,錫女仔既真係唔好心急,反正一旦得左就會欲罷不能,之後有排搞,使唔使急在一時,搞到女仔痛到以後都唔想搞咪弊。最緊要事後檢討,咁就有得提升。

2. 男人隻手最缺水 女人對波最多水

處男最中意直搗黃龍,尤其望住女朋友搞極都唔濕,就諗住係下面唔夠刺激,但你估你自己係加藤鷹咩,技術唔好就唔好白費時間啦,女人對波好敏感,下面會識做出水嫁啦。

3. 分散注意力

女人一緊張就子宮收縮加缺水,所以最緊要唔好淨係淋下面,喪咀,放鬆D佢就入到嫁啦。

4. 外物輔助

好多人以為戴套淨係用黎避孕,甚至以食藥代替套,錯曬。戴套第一係防性病(詳情可睇性女病),二黎係佢唔係淨係得個套,本身都有潤滑劑係上面。如果自己真係好乾,都可以試下再加潤滑劑,其實都係好正常既事,目標只係搞得開心姐。

5. 你覺得唔舒服時對方都會唔舒服

有D體貼既女友,明明自己勁痛勁辛苦都死頂唔出聲,仲要扮好high假淫叫。大姐,你以為男人真係傻既?真定假真係聽得出,最好唔好懶醒學AV女優叫,最假就係個種。其實唔舒服咪出聲,對方知道唔岩位,咪再一齊搵個舒服體位出黎,扑野係兩個人既事,梗係要互相就,我有時都會托下男朋友條腰幫下佢入。初學者入門pose都係男上女下嫁啦,唔好搞咁多野,咩香薰音樂個D都只係破壞氣氛。

6. 前戲唔好超過30分鐘

有男人太心急,都有男人太慢吞吞。前戲20分鐘就差唔多,半個鐘都未完既話會好悶,仲要係張床到,一個唔小心訓左就唔好啦。

7. 男人都覺得女人下面好靚

有好多女人(包括我自己)都覺得個西好核突,所以好唔想俾男朋友望到實佢,但我男朋友話我聽,佢地男人其實覺得下面好靚……

8. 讚下男朋友技術

男人,尤其是新手,都好渴望女朋友讚佢技術好。不過讚還讚,如果佢持久力唔太得,真係要逼佢練下,如果唔係次次你岩先濕佢就忍唔住射撚左,然後成個聖人咁趴係度,掂都唔想掂你就勁灰。

9. 破處唔會好似黎M咁

唔知點解我地成日都覺得破處會血流成河,實際上好多人都唔會流咁多血,以我自己為例,有無流我都唔記得左,係男朋友話我聽我先知自己流左少少。

香港好多女人成日聽到性都皺曬眉咁,拍拖幾年仲以自己無搞過為榮,你唔想搞係一回事,但係自己條仔都唔想搞自己,真係要反省下。


Related Articles

No comments

Write a comment
No Comments Yet! You can be first to comment this post!

Only registered users can comment.