[真人真事] $388激光脫毛「虎穴」(二)

[真人真事] $388激光脫毛「虎穴」(二)

上集:http://blablabla-media.com/%E7%9C%9F%E4%BA%BA%E7%9C%9F%E4%BA%8B-388%E6%BF%80%E5%85%89%E8%84%AB%E6%AF%9B%E3%80%8C%E8%99%8E%E7%A9%B4%E3%80%8D%E4%B8%80/
當初一口氣俾左萬幾蚊,但心諗可以換黎手呀加拿大呀面呀一條毛都無,係抵屌到爛。但除住上去做既次數愈來愈多,毛無明顯咁少到,而staff講既野愈來愈不知所謂,我開始諗,係咪中左伏?

正常激光脫毛做到第三至四次,毛髮生長速度已經會慢左好多,而做到第六次左右就可以完全破壞毛囊,除非日後生仔或荷爾蒙轉變可能生返d毛之外,正正常常既情況下都可以keep到幾年,甚至更長。但係我一直都有個疑問,究竟係我真係太多毛,天生異稟定係間公司呃我?我上去打左第三至四次,毛仲係出得好快(做完激光後三至四日已經出返,比起我用刀剃只係長左一至兩日),有次我打破毒女既心理關口,問個staff:點解我仲有咁多毛既?個staff當然帶我遊花園:因為你本身多毛嘛,我望落就覺得你比上次少左好多毛喇!(但上次明明唔係呢個staff幫我脫,咁都講得出,我無言了)雖然佢九唔答八咁,但係我俾左錢,又無理由唔做埋落去架嘛,心入面安慰自己,兒家只係兩三次姐,再脫耐d應該會見到成效既!

然後每個月我如常去脫毛,職員都如常咁sell我,頭幾次我係唔好意思咁推,去多幾個月之後我開始熟練起黎,有d技巧咁拒絕左。有次應該係個經理check到我個file,見我好多個月都無再開過單,我一上去佢就好熱情咁又話好耐無見呀,好掛住我呀,真係雞皮都起埋。然後入房換完衫之後佢又入黎開始r水吹,佢一路r,另一個staff幫我剃緊面毛,準備一陣打激光。我本身都只係係咁唔唔嗯嗯咁應佢,一黎唔想同佢吹水,二黎有人幫我剃緊面毛,我面咁大動作一陣刮到咪仆街?個經理自high一輪之後無啦啦哄埋我塊面到,然後好驚訝咁講:阿妹!你好似生疣呀!!!幫我刮毛果個staff又嚇一嚇,停左手,跟住就到戲肉喇,呢場鋪排左咁耐、精心策劃既大龍鳳終於開始。

「你知唔知呀,疣好得人驚架,會爛面架!」佢用極誇張既語氣,驚死我唔信,即刻掃佢部三叔手機,搵幾幅爛面圖俾我睇,雖然我平時睇慣d爛肉、蓮蓬等等既重口圖,對佢呢d咁既低lv既真係無咩感覺,但我睇完幅圖遁例都要交下戲既,咪應佢:係喎好恐怖喎~佢見我附和,又加多幾句:「係呀,好得人驚架,唔理佢既話愈生愈多,好快爛面,仲會變性病tim呀!」我心諗,屌,真係當我無醫學常識?疣都有大撚把款,大把人腳趾都有生疣,唔通一除褲會發現佢地個個都生性病?我就唔係好信。但係係咁陝窄既房間,個staff又停手停腳,我只好俾d反應佢,嗯佢一兩聲,想佢台戲快d完。經理見我不為所動,又加多幾錢肉緊:「拿,你兒家塊面有疣,我建議你最好脫左佢,過程唔痛架,兒家得一兩粒果陣脫左,好過生到全面都係,搞到爛面就好難返轉頭架喇!」我依舊話

唔需要,然後沉默左好耐既staff終於開聲:「其實脫疣好簡單架咋~經理佢係呢行出晒名係手勢好,又唔會留疤,係出面好難搵到有人手勢咁好架,同埋我見好多客都好似你咁,原本話唔脫,過左排走返黎自動搵我地脫,因為佢愈生愈多呀~佢地走去睇醫生,醫生係唔會理架,因為疣對人無咩影響,所以醫生會由得佢愈生愈多!」

其實佢指住我面上面果粒皮膚增生而凸出既小點,已經係我塊面到差唔多五六年,無變大過亦無變細過,先不論佢係咪疣,但唔痕唔痛,又唔會令我樣衰左,咪由得佢係到囉,搞咁多野做乜?佢地未等我應,又再進擊:「其實真係好平架咋,我地呢到幫你開支醫學針,一萬蚊,可以脫五十粒,係出面搵唔到咁抵架!」呢間美容院既staff真係獅子開大口,脫幾粒野,夠膽死收成萬蚊,雖然我無心脫,但我聽到成萬蚊,本能反應咁答好貴喎。佢地見我開始討論價錢,以為我有意買plan脫疣,再開多幾張爛面圖俾我睇,一邊話唔貴,一萬蚊就唔洗爛面喎,就算你搵醫生,俾左診金個醫生都唔會幫你脫,支醫學針成本都要幾千蚊,其實價錢真係好公道。我唔覺得我塊面粒野會有咁大影響,所以就態度照舊咁拒絕左,佢地兩個見我咁堅持,就同我講,見我係舊客,以前又買左咁多plan,可以俾50% off我,即係五千蚊,唔止脫五十粒,係包我脫晒終身,但係我都不為所動,因為我知道只要個人衛生做得好就唔會生疣,雖然自問唔係咩好乾淨既人,但都未污糟到成世人會不斷咁生疣掛?

經理見我仲係咁強硬,佢開始發老脾,語氣差左好多咁同我講:「拿,你兒家塊面生疣,我地係唔會幫你做脫毛,一陣好易污染到部機器同剃刀,好易傳染其他人,同埋幫你做脫毛既職員都好易會俾你惹到!」佢講到我好似有愛滋病咁恐怖,但明明未購買面毛療程之前佢已經檢查過我塊面,而我面上果陣已經有小肉粒,當時又唔見佢咁講?如果佢真係覺得我係一個有傳染性既客人,仲會叫我買面毛?我估佢話唔俾我做都只係想兇下我,咁我當然唔會俾佢大到,我求其答左句話出去睇皮膚科醫生再決定。佢愈黎愈惡,開始用鬧既語氣:「你唔脫左佢,我地好難幫你脫面毛,我都唔想我d staff俾你惹到,然後d客見到staff有疣又會唔想再黎,所以呢個唔止係你健康既問題,仲係公德心既問題。」、「都話左醫生係唔會處理疣,因為對人無生命威脅呀,你唔信咪算囉,到時你生到成面都係唔好返黎搵我脫呀!」佢露出一副極臭西既嘴臉去講呢番說話,我真係想兜巴車埋去,兒家覺得無需要咪唔買你d野囉,洗唔洗咁樣俾面色人睇?我無出聲,然後佢就叫個staff戴手套保護自己,廢事我傳染佢,叫倨staff繼續幫我做,然後就走左出去,砸一聲關埋道門。

場戲仲未完,個staff同我講經理真係好嬲,只係為我好所以先咁勞氣,係關心我,因為疣真係好得人驚。個staff接棒係咁sell我脫疣,最後我一直唔出聲無應過佢,個staff都醒水,自己收左皮了。

每次去脫毛,都要上演一場心理攻防戰,不但浪費時間,仲要無效果同受氣,有時候我真係唔知自己做乜要上去。當我腋下脫毛去到第6次,佢同我講,公司規定第7-9次只可以兩個月打一次,而第9次以後就只可3個月打一次,保養期都只可以3個月打一次。我當堂嚇一跳,咁重要既野點解唔第一次就同我講?呢樣野係直接影響到我購買既意慾,但佢竟然提都無提,真係好過份。因為我到左果陣腋下仲有五成毛,佢又同我講不如加錢買多幾次,可以俾我一個月一次咁打,仲包保養。我仆你個街我睬你都有味,俾你呃過一次仲會信?所以我無買到,佢都吹我唔脹,然後個黑衣經理又俾說話我聽,話我多毛呀點點點,總之就好撚煩。至於全腿,捱到第十次,仲係有七成毛,我屌你老母,佢又叫我加錢買終身,但我覺得係佢所謂「激光」機廢,就算俾我打多幾年都唔會甩晒架啦,屌,仲好意思sell我,所以我都無買。最後果2次,我無去到,因為我知道我身上既毛係唔可以靠呢間公司幫到我。

到最後,我總共洗左一萬幾千,買佢既所謂激光脫毛,我每個月有按住毛髮生長週期準時去脫毛,但最後腳仲有七成毛、腋下仲有五成,我真係好後悔買左呢間公司既療程,俾左錢效果唔理想,晒時間之餘又要受氣。每次去都係俾人sell同俾人sell,一搞就搞幾個鐘,同疲勞轟炸無咩分別,其實有時都幾佩服佢地,為左R你買野竟然連少少事都可以講到你好似就快生皮膚癌咁,究竟係哪裡來的勇氣?經過咁多次同佢地對抗同拉鋸之後,我發現左佢地sell野永遠都係得幾種方式,而只要淡定,即使係我咁毒都可以成功咁最後唔買野就走,係下一篇,我會講下對於去大型美容院前要做既心理準備同如何對抗被sell。

閨中毒女

閨中毒女

二十歲女生,混合偏油肌,外出和上學甚少化妝卻有買和收藏化妝品的怪癖。夢想能夠成為一隻鬆弛熊,每天懶懶閒。


Related Articles