[真人真事] $388激光脫毛「虎穴」(一)

[真人真事] $388激光脫毛「虎穴」(一)

「喂,今個月去左虎穴未?」 我每個月都會問我朋友

話說3年前,388脫毛優惠剛剛堀起,朋友JOIN了,我問佢覺得O唔OK,佢去左1次,話OK,咁我諗都唔洗諗就狗衝左,話晒激光脫毛,去間d字頭出名既都要幾千蚊,兒家388有交易,咁荀,仲要有朋友一齊,心諗實無死。同埋由細到大除左手掌腳掌之外全身都係毛,我已經唔想要忍受每次夏天著短袖衫褲都成個原始野人咁!!!加上暑假工賺左錢,諗住俾少少錢就可以唔洗再成個野人咁,抵到爛丫。

我第一次上去,單機,去到間鋪,心入面好緊張,話晒咁大個女第一次去美容院,仲要係去脫毛,難免有點尷尬。一入到去,職員好好笑容,叫我坐入房做CONSELLING,仲問我洗唔洗去廁所,要茶定要水,服務好好。但疑心病重既我緊係唔會飲佢d水,費事佢唔知落左咩藥等我WING下WING下逼我簽名咪仆街!

等左陣,有個好明顯高級D既黑衣人(佢制服係全黑,其他staff係藍色)走左入黎,拎住塊牌同我講講講,話咩澈光脫毛原理呀波長呀,我心諗,快_d啦我做左research先黎唔洗再同我講咁多,都無乜點理佢。佢up完一輪就帶我入treatment room,換衫訓係床,俾佢檢查下毛髮狀態。佢提供既袍露肩包胸,長到膝頭哥對上25cm,然後個黑衣人就入黎睇下我d毛。

「嘩!阿妹你好多毛啊!」我一舉高手佢就咁講,其實我都知,如果唔多毛我洗乜黎脫呀?然後講左一大輪野,順勢睇埋我D手手腳腳,再感歎多次我真係好多毛,到呢刻我真係好難堪,好想搵窿捐。而佢就好似睇穿左我果種無奈同難堪,係咁SELL我其他PLAN:全身脫毛、脫全腿、雙手等等。聽完一輪覺得全腿價格合理(7200做12次),於是就買左,然後佢見我肯買全腿,又開始攻擊我多毛呢個缺憾,又話我唇毛多好似生_(SO)咁,好似酸呀。講下講下我自己都覺,於是又買埋脫面毛(3000做12次),最後加埋388成萬幾蚊埋單。

但果陣心諗,俾一萬蚊多D就可以換黎光滑既美腿、加拿大唔洗再剃毛、唇毛無晒,都係抵既。但天真既我根本唔知只係噩夢既開始。簽完卡埋左單終於可以開始做,佢SELL我都SELL左成一個半鐘,俾完錢之後佢話就快有客做唔切全腿同面毛,只係做住加拿大先,叫我再BOOK過個時間做腳同面。然後佢用神速(10分鐘內)幫我剃毛、上GEL、開機打毛,刮返走D GEL,叫我換衫走。

第二次再去,做腳同面,佢STAFF叫我入房訓係床後又攻擊我多毛,又話夏天你咁多手毛敢著短袖衫?但我真係無錢,所以無買到手毛。然後佢見我不為所動,

佢都無郁過,就咁企係我床邊不斷SELL,見我真係無意思買手毛treatment,又開始轉移話題,話我面乾,做完激光面毛要搽防曬,推介我買支面霜,有防曬成份。咁我都知打完面毛要搽防曬,我都有少少興趣,然後佢見我有興趣,終於肯郁,幫我剃毛上gel開機,到做完之後,仲好主動咁拎左包sample入黎幫我搽面。到最後佢問我要唔要支野,我同佢講有d興趣,但要幾錢呢?點知開價640,我屌,你支野釀金?六舊水我買兩支shiseido防曬仲可能有贈品送tim。跟住佢見我話貴,又話出去同黑衣人商量下有無得平,最後佢話500,已經好平,果陣已經做完脫毛,我著住件袍訓係床上面,而佢亦都無想放我走既意慾,最後我就硬住頭皮買左佢支野,原來牌子係physiodermie,我返到屋企上網search,發現支野根本無spf,係其他地方賣只係320,唉,咁就做左水魚,我開始對呢個地方充滿戒心,每個月夠日子去脫毛都萬分不願意。

其後每次都係loop返以上既野,除衫換袍,一入房佢就係到sell,我唔應承佢就唔郁,應承左買佢就極快速幫我打晒d毛。但我頭兩三次中左伏之後,都係拒絕買佢既產品同額外既treatment,但每次佢總係搵到一大堆藉口去攻擊你,又話你面乾,打唔到面毛,要買facial package,一時又話你腋下毛囊閉窒,要買開毛囊藥水,總之手法陳出不窮……

但我買返黎既服務有無效果?388係咪真係可以包我退清有終身保養?我個人覺得如果你係耳仔硬既人,可以去一試,但唔好期望一年可以搞掂,因為呢d推廣多數帶有隱藏條款(頭六個月每月打一次,其後每三個月打一次,保養期只可三個月打一次),同埋佢多數唔會用足度數幫你打,然後就話你d毛真係太多好難打得晒,建議你加錢換plan,總之如果耳仔軟就真係千祈唔好去呢d平得離譜既優惠。

係下一期我會分享脫毛效果、更多佢地sell你買野而用,錯得好離譜既「醫學知識」,同埋我會講下去左咁多次,對抗佢地sell你野既心得,如果有諗過join 388或其他脫毛公司既朋友都可以留意下。

下集:http://blablabla-media.com/%E7%9C%9F%E4%BA%BA%E7%9C%9F%E4%BA%8B-388%E6%BF%80%E5%85%89%E8%84%AB%E6%AF%9B%E3%80%8C%E8%99%8E%E7%A9%B4%E3%80%8D%E4%BA%8C/

閨中毒女

閨中毒女

二十歲女生,混合偏油肌,外出和上學甚少化妝卻有買和收藏化妝品的怪癖。夢想能夠成為一隻鬆弛熊,每天懶懶閒。