看見絕路,唔想發生但又一定會發生既事

看見絕路,唔想發生但又一定會發生既事

新正頭,爆發咗一場嚴重既警民衝突,真係大吉利是。689既千般錯,唔使講,心景;點解要趕絕小販,又係典型既向財團傾斜。即使我支持民主(雖然好似係人地口中既On9左膠),今次既衝突都擺到明係預先策劃好,起碼係有心煽動啦,勇武本土試圖想用小販既苦況去反政府,而政府又樂於隨之起舞,二邊都覺得越亂越大單野就對爭取支持者有利,結果,今次係政府拎左著數。就好似上年既雨傘運動咁,係政府拎左著數,自己友唔會更團結/爭加支持者,反而港豬更靠攏政府。

身為左膠,和理非非,但你問我和理非非有撚用?我自己都心知肚明無撚用,尤其當雨傘後,左膠已經被邊緣化。但,勇武又有咩用?同樣,其實無架。大家都係圍爐取暖,FF可以終有一日喚醒港豬,但會喚得醒而唔係被你嚇走,就唔會俾你叫港豬啦。所謂革命,就係曬馬既遊戲,你唔夠支持,根本無可能成功。你今日行出去,自己友傷得一件無一件,而無新人加入。

不斷爭取公義,而又不斷流失支持,依個係勇武點罵人精神潔癖點罵人港豬都改變唔到既悲涼既事實。就好似雨傘運動之初,支持度爆燈,連我平日D叔伯兄弟都無聲出。但日子越耐,政府越挑起事端,我們依邊就不斷犯錯,不斷露出醜態,最終受挫既就只有反抗者。網上見到有人話咩魚蛋革命、警察開槍係轉捩點,D人開始轉向/邊歸,日後只會越演越烈,真係心諗。和理非非正式打柴,勇底取而代之,依個走勢都仲係雨傘既餘震Only。社運已經無可能返返轉頭係和理非非路線,但要玩亂局,而政府依一刻明顯更加多資源去玩,亦更加識玩。不知進退既勇武只會成為歷史注腳。

咩係真‧轉捩點?就係第一條生命。刻薄講句,不論正反雙方今日之所以可以鞭屍雨傘運動,就係因為無一條生命將佢升上神台,好似六四後期都係內部開始分裂,外部開始流失支持,但因為共產黨犯下更大的錯,所以無人會質疑學生當時係咻選錯了策略。按照目前既走勢,有人死真係遲早既事。左膠我當然係唔想依件事發生,但又無力地等住佢究竟幾時發生。而第一條生命係邊一方死先,就係個真‧轉捩點。而我,唔覺得風會向我地依邊吹。政府識玩得多,尤其佢地仲唔鍚身,因為卒仔於佢地係無物。到時,香港就正式玩完。依家仲係度嘈邊一邊暴力、要睇初衷唔睇手段、689點逼人反,我都好嬲,同埋一路更悲。


Related Articles

時代革命將臨︰論天琦被禁參選

天琦被禁參選,這大概是臉書開始有「嬲嬲」

假希望係香港人自己「煲」出黎

柒柒柒當選了。明明從選舉開波至今,柒柒柒

新加坡的預後(上)

本篇遊記側重談經濟,尤其是分析香港和新加