為什麼去污名化會得罪人/為什麼小眾要團結

為什麼去污名化會得罪人/為什麼小眾要團結

(戴定頭盔,我讀書少,所有關於社會結構嘅嘢都係我自己推斷出嚟,歡迎指正。)

每次有人提要幫某事某物去污名,都總有人衝出嚟話:死左膠/多此一舉/洗唔洗咁政治正確/C’mon get a life

有網媒報道咗男性性健康關注組織批評TVB劇集幕後玩家污名化AIDS病人,下面幾十個留言話個組織多此一舉,覺得套劇都係反映現實,的確有人因為惹咗AIDS想死,亦覺得(有百幾萬Reach嘅)電視台旨在提供娛樂,唔需要咩起移風易俗教化世人以正視聽嘅責任。

幫妓女去污名化有人會鬧、幫嫖客去污名化有人會鬧。件事唔係污名化咗啲咩Subject嘅問題,根本大家唔覺得「污名化」係一個問題。好多嘢要自己踏過落淌渾水度,你先會知污名/叫錯名,可以點樣毀咗一個人嘅生活,從而會明白「污名化」係一樣幾差幾無謂嘅字、「洗脫污名」係一樣幾刻不容緩嘅工作。前幾日有網民同我講,「老人癡呆症」改咗做「腦退化症」五年幾,我最初不已為然,但一Search新聞先知好多人覺得易名係好事。例如你有家人幻咗所謂「老人癡呆症」,佢唔想去求醫,情況愈嚟愈差。佢唔求醫,係因為「老人癡呆症」個顧名思議,就係老人家先有,確診後就等如被斷定癡癡呆呆、傻仔咁。你試過一次因為家人唔願被視為「老咗嘅傻仔」而唔願求醫、試過一次AIDS病人唔敢同朋友講自己一個承受壓力太大逼出病,就唔會覺得「係咁㗎喇」、「有呢啲病係慘㗎喇但唔可以要社會為你負責㗎嘛」。

可惜大多數人都係幸福嘅人,未踏過入呢淌渾水;又或者生活逼人、光陰心神有限,大家將世界對佢地嘅污名同標籤習以為常(例如:師奶=柒同計較;妓女=無腦貪錢、AIDS病人=濫交;鐘意影食物=一定係無品自我中心同膚淺嘅死港女;唐氏綜合症BB=學咩都唔識唔洗花資源教佢),與其嘥力同大家解釋唔好定形唔好污名唔好標籤,倒不如將怒氣內化為包容,所有嘢都自己食曬,再將一笑置之捧為忍耐同美德好過喇。如果大部份人嘅價值觀同身份認同係建基於錯嘅標籤同污名上,你行出嚟話要去污名,即係奪去咗佢地嘅美德(小眾逆來順受係美德)、同高人一等嘅身份(大眾嘅正常建基於小眾嘅唔正常),佢哋就緊係嬲喇。所以你話要幫小眾去污名,好多人會嬲你。

但我成日覺得,大部份問題都係教育問題。

一個人一出世,一定會將身邊嘅概念信手拈來,將現實奉為道理。大家都係螻蟻,冇人突然會覺得自己有去污名嘅能耐。我估歸根究底,Sociology社會學教育唔普及,係造成大家[take the reality as granted]嘅原因。今日有人問我成日掛喺口邊,四年半前讀嘅唯一SOCI Course帶咗啲咩畀我。我覺得除咗明白自己係Deviant/ Out of norm而唔係異形(儘管其實我一直都有70%生活同諗法品味好主流好Basic Bitch LOL),重明白咗其實reality is constrcuted。所謂Constructed,即係我哋日常生活中好多習以為常嘅觀念,都係口耳相傳咁樣由人建構出嚟。例如人有分男女有鳩有閪係事實,但好Man 、好Girly、好顧家呢啲構念係人類文明發展過程中嘅付產品。我細個都會覺得「男主外女主內、男人Man先係好、女人嫵媚才吸引」係規距,大個先明白,Reality is constructed,所有我哋曾經信過嘅規距,其實咪又係人訂嘅。

呢啲概念可能曾經係人類文明嘅基礎,甚至有啲污名都曾經有佢嘅正面社會作用。例如我地唔識醫治同隔離麻風病人嗰陣,將佢流放甚至燒死,的確係保護人類文明嘅方法。又例如社會曾經好動蕩,但又諗唔到好嘅福利制度去解決社會問題,將男主外女主內嘅角色分配畀各成年人,令佢哋各施其職,自己顧好自己個家同埋家中殘病老小,個社會就會穩定,人畜安樂,所以呢啲男主外女主內嘅觀念曾經係人類文明嘅重要部份;喺呢啲社會,「淫婦」嘅唔穩定性太高,食幾家茶禮,「理應」被往死裹打啊。但去到廿一世紀,社會結構變曬,如果我哋重攬住一啲舊時代嘅「人類文明基礎」過活,其實好反文明。

講到最後,我突然明白咗點解小眾要團結。每種小眾喺生活上都遇到不同嘅煩惱-盲嘅睇唔到嘢,做一樓一嘅會被警察扮查牌睇佢全相然後走人,過度活弱症細路嘅媽咪會畀人話佢唔識教仔咪搵藉口-但佢地面對嘅大問題都係得嗰幾個,除咗無資源發聲外,另一個問題係係「世人(自以為高床暖枕嘅大眾/視逆來順受為美德嘅小眾)唔願意理解小眾、唔願正視污名對其他人造成嘅傷害呢種問題」。各個範疇都有小眾,夾埋的話其實有好多人,去解決世人對小眾嘅睇法,令佢地所

當你自己係一個小眾,連結其他小眾,知多啲其他小眾嘅嘢,一次過令同你接觸嘅人明白其他小眾議題,藉此滅咗「我覺得同性戀OK,但變性人好核突囉」呢類諗法,係功德啊。

//據香港星島日報網站消息,香港今天(29日)起將老人痴呆症改名為「腦退化症」。新名是經過比賽後選出,由一位小學生提名。

負責舉行比賽的馬會表示,「腦退化症」可以更加正面及貼切反映病症,也希望消除公衆對痴呆症的誤解及成見,避免患者因為害怕受歧視而延誤治療。

香港衛生署、醫管局、港大及中大醫學院、評機會與其它政府機構、慈善團體,即日起會統一採用「腦退化症」去取代老人痴呆症。//

文章轉載自作者面書專頁: 地方的蕩婦(的不專業援膠手記)


Related Articles

那些「地域狗」:本地人和外來人的衝突

外地人看本土議題一向都是霧裡看花,有些事

撈金魚本來就是個殘忍的遊戲

「撈金魚」起源於日本江戶時代(也有說是由

社會應該至少有共識將亂倫非刑事化

每次談論到同性戀婚姻合法化的問題,有一些