家長應喺適當時候容許甚至建議子女去犯規

家長應喺適當時候容許甚至建議子女去犯規

當學生自殺變成一股風潮,問題明顯係出於體制而非個別學生。但政府仲施施然,支助緊兒童來港旅遊玩樂,叫人用放lunch 20分鐘去游水 — 我地(晨早就)應該醒覺呢個政府係幾咁冷血離地兼無能, 唔好對呢個政府有任何奢望。作為家長同學生,痛心同憤怒解決唔到問題的,我地應該齊心挑戰呢個殺人制度。

我有好幾個小學學生,每日10樣功課,未計預習、網上學習乜乜乜,日復日,消磨住佢地嘅生命、創意、學習熱誠同鬥志。我有d中學學生,日讀夜讀,認為「讀唔到大學就係廢物」。哈!咁呢個社會豈不是一個堆填區,有8成人都係廢物?中小學生,生活可以得翻訓覺嗰6、7個鐘叫做休息,成個青春攞左黎坐監。

作為家長,個制度唔合理、d觀念係扭曲嘅,你仲驚𢴇輸,要子女跟住社會嘅思維去走,揠苗助長,同推佢去死係無分別的。懇請各位家長,唔好怕事,在適當嘅時候容許甚至建議子女去犯規同違反學校嘅命令。因為你係佢唯一嘅靠山,萬大事一定要企翻喺佢嗰邊,唔好令死亡成為佢唯一嘅慰籍。講真,欠交下功課唔會死的、肥佬下考試唔會死的、記下缺點唔會死的,考唔到大學都係唔會死的。但你連同個社會一齊逼迫佢,搞到個細路四面受敵,佢就真係會死的。沒有任何成就重要得過個細路本身。

唔好怕,好明顯,呢個制度嘅設計係用黎馴化學生,磨鈍年輕人嘅稜角,為嘅係訓練服務權貴、聽聽話話有求必應嘅奴才。我地唔係奴才,個制度唔合理,我地就要去反佢。就算呢一刻唔完全反到,都要同佢鬥長命、鬥強,復仇心態又好點都好,生存落去,拉嗰班離曬地嘅契弟落黎,同呢個荒謬嘅社會死過。


Related Articles

台灣正宗芒果神拳震撼全日本 – ICE MONSTER

近來大家都在談文創,我想談談一個我覺得很

印度男尊女卑的背後

眾人皆知印度是一個男尊女卑的國家。在未去