唔小心爆左人大穫之後既五個藉口

唔小心爆左人大穫之後既五個藉口

八卦唔係女人專利,而係人類本性,好多時吹水吹到hihi地,腎上腺素急升就會多多少少失去理智,一野爆左人地啲真心唔講得既野出黎。但係人就係唔會認衰既,跌落地揦返拃沙是常識吧,明明係自己口疏仲要有一大堆理由,以下呢啲我聽都聽到厭既理由/藉口,唔該大家下次掩飾都作啲新少少既。

1.「唔緊要啦呢件小事黎姐」

其實呢,如果要特登講「呢件小事黎姐」,多多少少都有啲心虛,真係小事既話你直情連呢句都唔會講啦。而且有時個point係你實牙實齒應承左啊邊個唔好講既話,就算係細到人地痾完屎唔洗手既事,爆左都係你衰啦,呢句應該留返你應承人地守秘密個時講。

2.「我以為你都知」

人未必都係賤格中意周街唱人既,有時真係無諗過自己原來咁榮幸聽左個只有自己知既秘密。不過,咁講唔係話判你無罪釋放啊,愚蠢都係罪黎,你無講錯嫁,你爆出黎個刻咪全世界人都知囉!仲要一副「下,咩話!原來你唔知嫁?!」既樣,真係柒到唔敢睇。

3.「啊屌,唔小心爆左添,你唔好講出去」

嗱咁講又無一隻字係錯/講大話既,係真係「唔小心」啊嘛,不過呢句妙就妙在,佢將守秘密呢個責任,一個唔覺意咁樣交左響你手上,好似將個秘密嫁左俾你咁啊。唔好以為無咩所謂,我接收左佢又點話啊,你要知呢個叫「秘密」既女人分分鐘已經身懷六甲聽日就生得咁款,依家突然話要託付終身啊,經手人又唔係我,關我鬼事咩。

4.「無事既佢好口密」

呢啲好明顯係同當事人自首個時講既對白,如果我係個當事人,我應該滿腦子都係「得啦其實你可以唔使同我講」,自首不過係令你自己好受啲,秘密潑左出去仲有得剩既?!反正我都做唔到啲咩,真係唔知好過知。

5.「佢都唔識你,無事既」

唔解釋好過解釋系列之二。聽完呢句,當事人只會覺得眼前呢個人相當有問題,唔會覺得安心左,你話唔識姐,鬼知係咪嫁,「六層間隔理論」,你有無聽過啊!今日你以為呢兩個人大纜都扯唔埋,聽日可能就係你親自介紹佢地兩個俾對方。萬一你仲要爆啲真係好撚不堪回首既野出去呢?

其實呢個世界好細嫁喳,口又好多把喎,咁點算呢?

無嫁,姐係其實你講得俾第一個人聽個下,就要預左件事有機會通曬天,既然無保險買,就俾返個心理準備自己啦。

羞羞

羞羞

文藝存在我深深的腦海裏。 個人專頁: https://www.facebook.com/88shyshy


Related Articles

如果女人唔減肥,男人就大穫啦

[極端女權主義,男人慎入] 關於減肥,那

沒空都要見見朋友

經常在和某位久違的朋友敘舊後,在回家的路

No comments

Write a comment
No Comments Yet! You can be first to comment this post!

Only registered users can comment.