同全職高登仔拍拖既日常

同全職高登仔拍拖既日常

上高登已經成為左香港人生活既一部份,但係好多上過高登既市民都只係業餘級別。講到真正資深、堪稱同高登融為一體既高登仔,我識一個。不過嚴格黎說,應該話係識佢女朋友,於是姊妹夜話,就成日講起佢男朋友既奇事,同高登呢個第三者。

我個frd係醋罈黎既,一見佢男朋友勁認真咁禁電話,就會好緊張,扮曬唔覺意咁行過去偷睇下佢係咪同女仔whatsapp,但次次佢都一定係上緊高登。慢慢每次見佢好認真咁望住電話個mon,偶作思考狀,基本上唔使審都知佢係上緊高登。

好不容易毒L去exchange,我個frd日日都同佢skype,有次佢講起日頭係意大利旅行,去到一個風光如畫既湖前面,好靚,於是佢好陶醉咁坐低左。我個frd問「你坐係個度做左咩?」佢好淡然咁話「無啊,上高登囉。」講到呢度,我地開始腦補萬一有個無聊既鬼佬行過黎偷睇佢個mon,然後驚為天人咁發現高登牌emoji既生動有趣,高登衝出國際真係遲早既事。

「仲有仲有,佢講親有梗既野,唔洗問都知係高登梗。」我個frd多次強調佢男朋友係個完全無幽默感既人,但有時佢會突然講出D幾好笑既野。好似有次佢話將微波爐擺入蛋入面叮,笑死我個frd,仲一度以為佢都有例外既搞笑時候,點知佢無幾耐就補左句係「我係高登睇返黎」。如果佢唔自首,通常我個frd上上下網就會發現前幾日聽既笑話係高登既名段子,無一次係例外嫁。

中學老師成日教作文要引用權威,一般人最鍾意用「子曰」,佢男朋友就最鍾意用「d高登仔講」,配上篤定既眼神。如果高登仔派膠話高登巴打只可以同絲打拍拖,我個frd話,佢懷疑佢男朋友真係會同佢分手。

唔止咁,「佢講野仲好高深嫁。」知唔知「呀啦瓜巴拉巴」係咩?佢男朋友成日同佢講「達朝話」,高登中人應該就知,「呀啦瓜巴拉巴」係「我愛你」既意思。達哥D名句佢全部都記得實一實,仲熟過irregular verbs table,仲有契弟走得摩、科斯又名科斯武、嘰哩咕嚕、殊樂畢比……聽到我個frd都暈暈下。

羞羞

羞羞

文藝存在我深深的腦海裏。 個人專頁: https://www.facebook.com/88shyshy


Tags assigned to this article:
網絡文化達哥高登

Related Articles

如果灰姑娘係男人

從小,世界各地的小男孩便坐在螢幕前,看著

顏射射入眼急救法

與男朋友同居一年,當然一有時間就把握機會

No comments

Write a comment
No Comments Yet! You can be first to comment this post!

Only registered users can comment.