假希望係香港人自己「煲」出黎

by 亂噏無罪 | 三月 26, 2017 7:50 下午

柒柒柒當選了。明明從選舉開波至今,柒柒柒比薯片叔叔得中央心係一個明顯不過既事實,但好多人,包括薯片叔叔本人,曾經幻想過會係一號當選,而唔係柒柒柒。依個假希望係點黎?依個假希望係香港人自己「煲」出黎。

睇返二位係選舉既表現,無可否認,薯片叔叔既公關打得好太多,好到居然甚至會出現到幾千人既造勢大會。係傳媒報導或訪問入面,記者唔跟選舉個遊戲玩去死纏D內地高官、商界人士,反而不斷報導市民點樣一面倒甘片柒柒柒,一面倒甘撐薯片叔叔,市民點樣瘋狂追捧著片,彷彿依場係真選舉,彷彿操控民意就可以勝利,彷彿唔記得咩叫小圈子選舉。

相信薯片叔叔會嬴既人,同當初相信雨傘運動會有成果既人係一樣。佢地相信「香港人」的民意應該多多少少係有D分量,就算係共產黨都唔會壓得住。選舉期間,好多人插黃絲變薯粉係背棄民主,係我眼中,他們根本無變過,大家求真普選都係求自己既聲音進入到制度,會有影響力,香港可以少不公義之事,你話佢地天真睇唔透都好,但如果佢地真係成功「造王」,對於好多仲堅持守護香港既人黎講,鼓舞既程度可能同爭取到真普選係一樣甘高。只係可惜原來沒有,從來都沒有。我地既民意係有用呀,將689變成777囉,你覺得有無分別。之前好多人係度煲中央對港路線變溫和,但君不見689無幾耐之前先當選全國政協副主席。依場選舉,筆者從來無一刻覺得著片叔叔會嬴,如果睇民意一早俾左你真普選啦。中央其實一直都明目張膽非常清晰甘話俾香港人知,佢地丁丁都唔在乎你地既民意,佢地無玩過假希望,如果要玩假希望,就會俾著片叔叔上,然後再利用著片叔叔既「民意基礎」去破壞香港更多。

你問我,甘可以點。如果我知可以點,我一早出左黎救港。我唔係薯粉,但好同意著片叔叔既失敗感言,因為今次一定唔會係最後一次香港人既意願被強姦。

「我衷心請求大家,千萬唔好放棄香港,如果今次選舉,令我哋更了解未來的價值,更加體會到我哋對呢個家的熱愛,我相信我哋的得著遠比失去的多。」

Source URL: http://blablabla-media.com/%e5%81%87%e5%b8%8c%e6%9c%9b%e4%bf%82%e9%a6%99%e6%b8%af%e4%ba%ba%e8%87%aa%e5%b7%b1%e3%80%8c%e7%85%b2%e3%80%8d%e5%87%ba%e9%bb%8e/