[我城是非] 不解為何去塔門要野餐/野餐要選擇去塔門

[我城是非] 不解為何去塔門要野餐/野餐要選擇去塔門

今日一行四人去左塔門野餐,但所見所聞簡直令我完全憤怒,我不解,點解去塔門要野餐,想野餐要揀去塔門,或者你睇完成篇野,會覺得我企係道德高地鬧人,但係,無論你有無共鳴,都希望你可以藉此反思下,唔好成為你自己討厭既人。

去到塔門觀景台,一對情侶帶左兩隻狗仔黎野餐,有一隻牛望住呢對狗仔,突然之間隻牛行左埋去,綁住狗帶既兩隻狗就非常激動地狂吠,呢對情侶亦立刻保護兩隻狗,男的仲執左枝樹枝拍打呢隻牛既背部,最後隻牛係比佢趕出左個亭。

其實,大家都是動物啊,私家狗和自然牛就有這麼大分別?

然後我地搵左一個面海既地方準備野餐,四個人面海食波羅腸仔其實真係幾舒服,然後食緊蛋沙津三文治既時候,突然有人大叫:「小心後面呀!」我地四個同一時間望後, 但已經趕唔切了,有隻牛高速地向我地既方向飛奔,距離已經得番兩米,一秒時間都無,佢已經食左我身旁既蘋果,然後咬爆左包桃哈多,連包裝食埋落口,果位叫我地小心既年青人是義務的「趕牛者」,我地五個人睇住隻牛吐番個包裝出黎先鬆一口氣。 趕牛者話,係其他後生仔向牛掟零食,先會令隻牛發狂。

隻牛之後轉移目標去左再遠少少既女人群當中,有位女士開左把鮮藍色既遮「趕牛」,然後仲向遠處掟蕉,希望引隻牛去第二到,之後仲掟埋牛肉,我無言。然後愈黎愈多牛,佢地衝左去唔同人群當中食左唔同既野,我地亦因此而轉移陣地左三次。

有唔少人拎住枝極粗既樹枝防備,有時其實隻牛都無打算衝埋黎,啲人已經狂用樹枝撃地希望趕走佢地,有啲樹枝其實兩米咁長,有時候其實隻牛根本企定定唔郁,又會有人特登用樹枝引佢地過去,有時候其實佢地食緊草,你又要趕,你地係唔係打上癮,你地同班黑警有分別嗎?保護女生,成功打牛,好型?

其實你地知唔知一啲都唔好玩?
其實你地知唔知呢到係佢地本身居住既地方?
其實你地知唔知你地先係呢到既外來者?
其實你地點解唔自己搬走啲野,而要不斷地趕走啲牛,即使佢地少少行動都無?

我明白,牛衝埋黎食你既野,你起桿係岩,
我明白,你同牛保持安全距離都係必要的,
我明白,適當地運用樹枝趕走啲牛,可能係唯一保護到自己既辦法。

但你地明唔明白,其實啲牛本身係唔食零食?就係因為有人亂咁餵野食比佢地,佢地知道你會繼續請,就好似上文提及過既掟牛肉女士一樣,你掟完香蕉仲要掟牛肉,你真係覺得佢地會就咁算?

但以上種種都唔係觸發我憤怒情緒既主因,直到我地轉移陣地第三次,鋤緊DEE既時候,突然有好多隻牛都一齊過左黎呢邊,但明顯佢地已經無正午咁肚餓,佢地主要都係食地上僅餘既草。

有一隻牛行左過黎 (終於唔係衝),望住垃圾袋入面既火龍果皮,我地立刻拎走袋垃圾,佢再望下野餐布唯一既啤牌,然後都無諗過要將佢地吞落肚,我覺得其實佢地係識分邊啲係野食,邊啲唔係野食,所以佢地只係食左我地蘋果,而無食到大富翁。

然後,有一隻母牛係我地側邊跪低左,之後索性卷埋一舊坐係到,我地初頭唔知佢做咩事,以為佢行左成日好攰,所以我地都係坐係到吹下水,然後我地發覺佢個肚異常地漲,仲突然流眼淚,再上網CHECK下,我地發覺呢隻牛有99%大左肚,佢既陰部亦非常漲。

( 果陣係參考呢個網的 : 如何分辨母牛是否要分娩 )
(http://zh.wikihow.com/%E5%88%86%E8%BE%A8%E6%AF%8D%E7%89%9B%E6%98%AF%E5%90%A6%E8%A6%81%E5%88%86%E5%A8%A9 )

果一刻係好心痛,你可以話我誇張,但事實係咁樣,有惻隱之心既人都唔會無感覺,呢個時候見到佢不斷流眼淚,又不斷望住自己個肚,啲遊客又不停地同佢影相,又無野可以食,我覺得好無助,唔知可以做咩好,係既,可能一切都係我自己FF出黎,但係,果一刻,我唔明點解我地要霸左佢地住緊既地方,點解要霸住佢地既草地,點解要霸住佢地既屋企?點解我地霸人地既地方,仲要用樹枝趕走呢班主人?我唔明點解。

容我打個比喻,有賊入屋,趕個賊走定係你自己走?梗係趕個賊走,點知個賊唔走不得止,霸哂你間屋不特止,仲要趕埋你走添,你番黎拎番啲野?佢打番你轉頭啊。你嬲唔嬲?

但牛可以揀嗎?

然後有幾乎一小時我都望住呢隻牛,唔知,其實望住佢係唔可以幫到啲咩,而牛其實係識得自然分娩,有新生命亦都係一件好值得高興既事,但唔知點解我覺得好唔開心。

點解唔開心會變做憤怒,就係因為之後發生既呢一件事。

係我地遠少少既地方,有隻牛又衝左去一堆無人看管既零食入面,又咬爆左一包薯片,一位非常高大既男人又用超級大碌既樹枝撃打地面,甚至打呢隻牛隻腳同埋背部,佢仲吆喝呢隻牛唔好再食,極之惡,我企係側邊唔出聲,直到果隻懷孕既牛行左埋黎睇,零行動,呢位男人又走去打呢隻母牛隻腳,又想嚇走佢,呢一刻我真係按捺不住,大聲同佢講 「呢隻牛大左肚唔該你唔好打佢嚇佢」

佢非常之惡地答我「佢地食左啲膠落左肚就大獲,又食哂人地啲野。點知佢大肚呀。」

是的,我都比牛食左蘋果同桃哈多,是的,隻牛個肚大到咁樣,唔通食左個人落肚?你會唔會係唔知道同埋望唔到?點解你要打啲牛,點解你要打一隻大左肚既牛媽媽?唔知道就大哂?睇唔到就大哂?

咩叫做「驚啲牛食左啲膠落肚?」

呢個亦係我呢篇日記既標題,點解我地要黎塔門野餐?有牛的地方,帶唔食得落肚既零食黎,有問題、應該檢討既係唔係我地?點解仲要打佢地?其實我地是否唔應該去有咁多牛既地方野餐?其實野餐,係唔係有更好既地方可以揀?

你覺得牛阻住你既雅興,咁你唔好再同人講你覺得內地人阻住你,因為係我眼中,你地同班爭資源、無禮貌,周街大小二便既內地人一樣無分別,霸人地方仲要唔好好管理自己,然後鬧番主人家轉頭,you are exactly the same.

是的,我係企係道德高地,或者你會想批評我,咁愛牛咁你又食牛?是的,我認我係呢一點上係好賤格因為我都會食牛會食雞會食豬,但今天後,一星期一天茹素,我會盡力,好似係無用,但至少你有反思過,已經好好。

如果再揀,我唔會再係塔門野餐,為左自己又好,為左班牛都好,希望,你地都係。

讚好喧嘩專頁,看更多最新文章

蘭道夫

蘭道夫

水清無魚,心清無悔; 天地人事,唯心而已。


Tags assigned to this article:
保育塔門野牛

Related Articles

No comments

Write a comment
No Comments Yet! You can be first to comment this post!

Only registered users can comment.